Молитва ко всем святым, в земле Российской просиявшим
О всеблаженнии и богомудрии угодницы Божии, подвиги своими Землю Русскую освятивший и телеса своя, яко семя веры, в ней оставльшии, душами же своими Престолу Божию предстоящий и непрестанно о ней молящийся! Се ныне, в день общего вашего торжества, мы, грешнии, меньшии братия ваши, дерзаем приносити вам сие хвалебное пение. Величаем ваша великия подвиги, духовнии воини Христови, терпением и мужеством до конца врага низложившии и нас от прелести и козней его избавляющий. Ублажаем ваше святое житие, светильницы божественнии, светом веры и добродетелей светящийся и наша умы и сердца богомудренно озаряющий. Прославляем ваша великая чудеса, цвети райстии, в стране нашей северней прекрасне процветший и ароматы дарований и чудес повсюду благоухающий. Восхваляем вашу богоподражательную любовь, предстателие наши и покровителие, и, уповающе на помощь вашу, припадаем к вам и вопием: равноапостольнии просветителие наши! Споспешествуйте людем Русския Земли преданную вами веру Православную твердо содержати, да спасительное семя, вами всеянное, не изсушено будет зноем неверия, но дождем Божия поспешения напоенное, плод изобильный да принесет.
Святителие Христови! Молитвами вашими утвердите Церковь Русскую, ереси, расколы и нестроения в ней потребите, расточенный овцы воедино соберите и от всяких волков, во одежде овчей в стадо Христово входящих, оградите.
Преподобнии отцы! Сохраните нас от прелестей мира сего лукаваго, да отвергшеся себе и вземше крест свой, последуем Христу, распинающе плоть свою со страстьми и похотьми, носяще тяготы друг друга.
Благовернии князие! Воззрите милостивно на земное отечество ваше и вся нечестия и соблазны, в нем ныне сущия, оружием молитв ваших потребите, да, якоже древле, тако и ныне, и в грядущее время, прославляется на Святей Руси имя Господне.
Страстотерпцы Российстии преславнии! Укрепите нас в мужественнем стоянии даже до крове за веру Православную и обычаи отеческия, да ни скорбь, ни теснота, ни гонения, ни глад, ни нагота, ни беда, ни меч не возмогут нас разлучити от любве Божия, яже о Христе Иисусе.