Боготечною звездою мир Небесный, Владычице, осветила, но земных чад Своих, в скорбях пребывающих, не забыла. До времени безымянная, на земле Тарасовстей во храме Успения, послужила икона Твоя для чтущих память Твою во спасение. Освятившись благодатию пребывания в сем храме преславнем, благоизволила явити Себя миру во образе православном. Яко утверждение непреложное веры истинныя и небурное Пристанище для вопиющих Богу: Аллилуиа.
Воистину непостижима милость Твоя, Пречистая, к заблудшим, Любовь и сострадание ко всем, во тьме греховной сущим. Избрав рабу Свою, несведущую в иконописании, Ты благословила, дабы Образ Твой живописный в соответствии с канонами изменила. Даровала Ты рабе сей дерзновение Тебе послужити, Лик Пресветлый Твой во Православныя одежды облачити, дабы всяк, приходяще, на икону сию взирая, воспевал песнь Богородице, с умилением взывая:
Радуйся, в пределах Киевских славу чудес Твоих проявившая, Радуйся, на земле Тарасовстей Себя Пристанищем страждущим явившая. Радуйся, покрывати женам плечи и главу вразумляющая; Радуйся, святоотеческую православную веру непорочну сохраняющая. Радуйся, от уныния опущенные долу руки укрепляющая; Радуйся, изнемогающия очеса зрением иконы Твоея увеселяющая. Радуйся, вражды и нестроений в мире бренном разрушение, Радуйся, семейств, в благочестии живущих, благословение, Радуйся, всех, за правду стоящих, твердое защищение, Радуйся, Похвало наша Всепетая и Утешение. Радуйся, земное и Небесное Пристанище чад Твоих, в заступлении нуждающихся.
Ветхий корабль человечий сокрушает неистовая буря сомнений. В бурном море житейстем вздымаются волны мирских попечений. Не ведаем, где обрящем мы, сирые, Пристанище спасения, токмо на Тя, Матерь Божия, возложим надежду и дерзновение. Имуще Попечение Твое, Поборнице на супротивныя, молим Тя слезно: помози нам, Владычице Предивная, Дево Непорочная, к иконе Твоей, как к Пристанищу, прибегаем, взыскати Тобою безпреткновенный путь спасения уповаем. Теплые моления к Тебе, Пречистая, не возносим всуе, яко можеши помощи всем верным, взывающим Богу: Аллилуиа.
Странно и дивно есть зрети чудо сие, недоступное плотскому разумению, колеблют умы наша мятежныя смущения и недоумения: како мы, многогрешнии и недостойнии, возможем дерзати Тя, Пренепорочная Владычице, достодолжно восхваляти. Предузрев явление Образа Твоего, старец – духовник Лавры Почаевския, Божиим Промыслом преднаименова Его «Пристанище», очесами духовными силу и изобилие чудес прозревающе, чрез дивный Образ сей всем верным произтекающих, пристанище даруя людям православным, с Богом сущим, благодарящим Тя всеусердно и во умилении вопиющим: