Сир кыыла барахсан
Сааскы хоборго букатын
Санаммат эбээт кырдьыга,
Ситэн сиэри гымматахха.
Саха оҕонньотторо былыр
Сүбэ кэриэтэ сэрэтэллэрэ:
Сааскы тыалга үрдэриэҥ,
Сиикэй мууска кииримэ.
Сааспыт барахсан саарбаҕа
Сатаан өйдөөн сырыттахха,
Сүрэҕи көнньүөрдэр кэрэтэ
Сөҕүмэр элбэҕэ сөхтөрөр.
Сылаас күннэр үүннүлэр,
Сааскы көстүү элбээтэ,
Сүһүөх кычыгылана оонньоото,
Сүрэх күүскэ тэбиэлээтэ.
Тымныы баарын биллэрэр —
Түүҥҥү дьыбар кытаанах,
Тоҥорор-хатарар барытын
Талбытынан дьаһайар.
Кэлэн иһэр кыайтарбат,
Кэлиитэ да баһырхай,
Килиэ мууһу уулларан
Күлүмүрдэтиэ чалбахтары.
Хатырык быыһыгар сахсырҕалар
Холкутук кыстыгы туорааннар,
Хаамыстылар күн суоһар,
Хаһаайыттар буоллулар.
Хотулата арҕааттан бүгүн
Хапсыыр тыала ылла.
Хаарбыт уутун сыыһын
Халлааҥҥа салгынынан көтүттэ.
Күммүт чаҕылыйан сүрдээх:
Кырыс сири сылытта,
Куурдар үлэни ыытта,
Кураан иһэрэ билиннэ.
Сир дойду сааскытыйда,
Сыыр сирэйэ көҕөрдө.
Силлиэ тыалбыт тараата
Сис тыаны, чараҥы.
Кураан да буоллар
Күүскэ мөхсөн, үлэлээн,
Кыстыыр аһы булуохпут,
Кыһыҥҥыга хаһааныахпыт.
Күүтүүлээх күммүт үүннэ
Куспут көнүлэ кэллэ.
Кэтэстибит да этэ
Кыһыҥҥы уһун кэмҥэ.
Кустуу барар күнү
Кыра уол оҕолор
Кыһаллан тураннар
Кэтииллэр эбээт.
Кырдьаҕас оҕонньоттор
Күл, кумах куталлар,
Күөл чычаас атаҕар
Кыра уу таһааран.
Кэтэһиилээх киэһэ
Киирдилэр дугдаҕа,
Кэҥсик таһааран
Күндүлээтилэр сирдэрин.
Куска киирээччилэр
Көтөҕүллүбүт сүргэлэрэ,
Кэпсээн да элбээбит
Кэрэ да киэһэ үүммүт.
Кус бултамматар да
Кутаа тула олорор,
Күө-дьаа кэпсэтэр
Күндү ээ биһиэхэ.
Алыс дьикти күннэр
Ааһан эрэллэр элэҥнээн,
Ааспыт күн мичилийбитэ,
Аны бүгүн хаардыыр.
Хара сир аныгытыгар
Ханна да суох Саталбытыгар,
Ханна эрэ арааһа
Хара ала кулун төрөөтө.
Тыала-кууһа үлүгэр
Тоҥ хаарын тибэригэр,
Туундараны санатта,
Туоххаһытта дууһаны.
Ыраас маҥан хаар
Ырааһа, сырдыга
Ыра санаа курдук
Ыраастаата санааларбын…
Саас күүһүн ылла:
Сыһыы кырдала
Симэннэ сибэккинэн,
Сааскы ньургуһунан.
Кыра, улахан хоптолор
Күөлүм үрдүнэн
Көтөллөр айманан,
Көрдүүллэр күөнэҕи.
Элиэ ас көрдөнөн
Элиэтиир күннүктээн,
Элиэ көтөр салгыҥҥа,
Эрэлин сүтэрбэт барахсан.
Салгыҥҥа, хонууга
Сыыгыныы көттүлэр,
Сырсыакалаһан бардылар
Сир үөнэ арааһа.
Айылҕа уһуктарын
Анаан кэтээтилэр,
Айыылартан күүс ылан
Алыһын көнньүөрдүлэр.