Молитва ко Господу о спасении России
Го́споди Иису́се Христе́, Бо́же наш, приими́ от нас, недосто́йных рабо́в Твои́х, усе́рдное моле́ние сие́ и, прости́в нам вся согреше́ния на́ша, помяни́ всех враго́в на́ших, ненави́дящих и оби́дящих нас, и не возда́ждь им по дело́м их, но, по вели́цей Твое́й ми́лости, обрати́ их: неве́рных – ко правове́рию и благоче́стию, я́ко да ни еди́н от них поги́бнет нас ра́ди, недосто́йных; ве́рных же – во е́же уклони́тся от зла и твори́ти благо́е.
Нас же всех и Це́рковь Твою́ Святу́ю – всеси́льною Твое́ю кре́постию от вся́каго зла́го обстоя́ния ми́лостивно изба́ви, и страну́ Росси́йскую от лю́тых враго́в и вла́сти их свободи́. Ве́рных рабо́в Твои́х – в ско́рби и печа́ли – день и нощь вопию́щих к Тебе́, многоболе́зненный вопль услы́ши, многоми́лостиве Бо́же наш, и изведи́ из истле́ния живо́т их. Пода́ждь же мир и тишину́, любо́вь, и утвержде́ние, и ско́рое примире́ние лю́дем Твои́м, и́хже – Честно́ю Твое́ю Кро́вию – искупи́л еси́.
Но и отступи́вшим от Тебе́, и Тебе́ не и́щущим – явле́н бу́ди, вое́же ни еди́ному от них поги́бнути, но всем спасти́ся и в ра́зум и́стины приити́: да вси в согла́снем единомы́слии и в непреста́нной любви́ просла́вят пречестно́е и́мя Твое́, терпеливоду́шне, незлоби́ве, Го́споди, во ве́ки веко́в. Ами́нь.
Молитва ко Пресвятой Богородице о России
Засту́пнице земли́ Росси́йстей и непреста́нная за нас моли́твеннице, мир наро́ду у Го́спода испроси́, да святи́тся в нас и́мя Бо́жие во ве́ки. Ами́нь.
Молитвы пред иконой Божией Матери «Державная»
Молитва 1-я
Держа́вная Влады́чице Пресвята́я Богоро́дице, на объя́тиих Свои́х держа́щая содержа́щаго всю вселе́нную Царя́ Небе́снаго! Благодари́м Тя за неизрече́нное милосе́рдие Твое́, я́ко благоволи́ла еси́ яви́ти нам гре́шным и недосто́йным сию́ святу́ю и чудотво́рную ико́ну Твою́ во дни сии́ лука́выя и лю́тыя, я́ко вихрь, я́ко бу́ря ве́тренняя наше́дшая на страну́ на́шу, во дни уничиже́ния на́шего и укоре́ния, во дни разоре́ния и поруга́ния святы́нь на́ших от люде́й безу́мных, и́же не то́чию в се́рдце, но и уста́ми де́рзостно глаго́лют: несть Бог; и в де́лех сие́ безбо́жие показу́ют. Благодари́м Тя́, Засту́пнице, я́ко призре́ла еси́ с высоты́ святы́я Своея́ на ско́рби на́ша и го́ре чад правосла́вных, и я́ко со́лнце све́тлое, увеселя́еши изнемо́гшия от печа́ли очеса́ на́ша пресла́достным зре́нием Держа́внаго о́браза Твоего́.