Песнь 7.
Ирмос: Отроки, Бога в Троице предвозвещая, трие в пещи огненней неврежденны от мучителей явистася, идолом тварским не поклонившеся, славословящи Создавшаго, вселенную всю воздвизая пети Ему: Господа пойте, ангели и людие, и превозносите славу Его во вся веки.
Святый Архистратиже Божий Михаиле с небесными воинствами, молите Бога о нас.
Свет явил еси щедре ангел Твоих невещественное существо, неизреченнаго света исполняемы, непрестанно зовуща Ти: благословен еси, Господи Боже, во веки.
Святый Архистратиже Божий Михаиле с небесными воинствами, молите Бога о нас.
Ему же предстоят, непрестанно служаще, светы ангельския, лица же зрети Света Божества трепещущи, благословен еси, зовуща, Боже, во веки.
Слава Богу Вседержителю, Богу Слово и Божественому Духу.
Словом твоим ипостасным, Господи, ангельское естество соделал еси. Освятив же Божественным Духом, Троицу Тя благословяща пети, благословен еси , Господи Боже, во веки.
И ныне и присно и во веки веков. Аминь.
Три убо зряще суща составы, Неописанное славим Существо, Бога Вседержителя, Бога Слово и Божественнаго Духа, вопиюще: благословен еси , Господи Боже в Троице Единый.
Песнь 8.
Ирмос: Тайну Девыя предвозвещенныя, чистоту таковую тварския служителие убояшася. Но мы, христовы, их идольскую лесть мужески попраша, возопиим Приснодеве во умилении: славься, Пречистая,Победо Непобедимая, горних воинств и дольних Доблестная Водительнице.
Святый Архистратиже Божий Михаиле с небесными воинствами, молите Бога о нас.
Ангельскому поревнуем житию и, взором разума горняя осеняя, со лики ангельския возопиим вкупе Господу: Слава Тебе, Боже наш, во веки.
Святый Архистратиже Божий Михаиле с небесными воинствами, молите Бога о нас.
Ликовственницы лика небеснаго, иже Престол обстоящи Славы, о Бозе всегда обращаеми ангели, поют и славословят Господа во вся веки.
Слава Богу Вседержителю, Богу Слово и Божественному Духу.
Невещественныя огня творящей пламы, на высоте непрестанно служащих, и ангелы духи являющей Троице покланяемся и славословим во веки.
И ныне и присно и во веки веков. Аминь.
Богородичен: Иже во утробу всельшася Девыя, и от Сея страшно и выше разумения человеча Боговоплощение зряще ангели, поем и славословим во вся веки.