Благоверному князю Петру и княгине Февронии, Муромским чудотворцам
Тропарь, глас 8-й
Я́ко благочести́ваго ко́рене пречестна́я о́трасль был еси́, до́бре во благоче́стии пожи́в, блаже́нне Пе́тре, та́ко и с супру́жницею твое́ю, прему́дрою Февро́ниею, в ми́ре Бо́гу угоди́вше и преподо́бных житию́ сподо́бистеся. С ни́миже моли́теся Го́сподеви сохрани́ ти без вреда́ оте́чество ва́ше, да вас непреста́нно почита́ем.
Кондак, глас тойже
Ми́ра сего́ княже́ние и сла́ву вре́менну помышля́я, сего́ ра́ди благоче́стно в ми́ре пожи́л еси́, Пе́тре, ку́пно и с супру́жницею твое́ю прему́дрою Февро́ниею, ми́лостынею и моли́твами Бо́гу угоди́вше. Те́мже и по сме́рти неразлу́чно во гро́бе лежа́ще, исцеле́ние неви́димо подава́ете. И ны́не Христу́ моли́теся сохрани́ти град же и лю́ди, и́же вас сла́вящих.
Молитва
О, вели́ции уго́дницы Бо́жии и преди́внии чудотво́рцы, благове́рнии кня́же Пе́тре и княги́не Февро́ние, гра́да Му́рома предста́телие и храни́телие, и о всех нас усе́рднии ко Го́споду моли́твенницы! К вам прибега́ем и вам с упова́нием кре́пким мо́лимся: вознеси́те о нас, гре́шных, святы́я моли́твы ва́ша ко Го́споду Бо́гу, и испроси́те у бла́гости Его́ вся благопотре́бная душа́м и телесе́м на́шим: ве́ру пра́ву, наде́жду бла́гу, любо́вь нелицеме́рну, благоче́стие непоколеби́мо, в до́брых де́лех преуспея́ние, ми́ра умире́ние, земли́ плодоно́сие, возду́ха благорастворе́ние, телесе́м здра́вие и душа́м спасе́ние. Исхода́тайствуйте у Царя́ Небе́снаго Це́ркви Святе́й и всей держа́ве Росси́йстей мир, тишину́ и благоустрое́ние, и всем нам житие́ благополу́чное и до́брую христиа́нскую кончи́ну. Огради́те Оте́чество ва́ше и вся гра́ды Росси́йския от вся́каго зла; и вся правове́рныя лю́ди, к вам приходя́щия и святы́м моще́м ва́шим поклоня́ющиеся, осени́те благода́тным де́йством богоприя́тных моли́тв ва́ших, и вся проше́ния их во бла́го испо́лните. Ей, чудотво́рцы святи́и! Не пре́зрите моли́тв на́ших, со умиле́нием вам днесь возноси́мых, но бу́дите о нас при́снии предста́телие ко Го́споду, и сподо́бите нас по́мощию ва́шею спасе́ние ве́чное улучи́ти и Ца́рствие Небе́сное унасле́довати: да славосло́вим неизрече́нное человеколю́бие Отца́ и Сы́на и Свята́го Ду́ха, в Тро́ице покланя́емаго Бо́га, во ве́ки веко́в. Ами́нь.