Кыстык мууһун бүрүнэн,
Күүгэннирэ дэбилийэн,
Көтөҕүлүннэ күйгүөрэн
Күндү мин Аммам!
Күүстээх тымныы хапчайан
Күлүмүрдэс долгун бохсуллан,
Кыстык уһун ыйдарын
Кыстаата мууска бопторон.
Күммүт уота сырайан
Кыстык хаарбыт ууллан,
Кылыгырыыр үрүйэлэр
Көтөхтүлэр көмүөлү.
Киһи-аймах астынан,
Кыһын барарын атааран,
Киирдилэр кытылга
Кэһии астаах, алгыстаах.
Кыыс Амма түллэр,
Кырыа мууһун ыраастыыр,
Кытылларын талаҕын
Кирин-хоҕун сиппийэр.
Кытылга турар дьонум,
Кырдьык, сэбэрэлиин сырдаан
Көрүстүлэр уонна атаардылар
Көмүөл мууһу уонна кыһыны.
Таптыыбын эбээт Тааттабын,
Ахтабын эбээт Аммабын,
Хайгыыбын эбээт Харбалаахпын,
Түһүүбүн эбээт Төҥүттэбин.
Кииниҥ түспүт сирэ,
Киһилии саҥарбыт түөлбэҥ
Кимиэхэ баҕарар күндү,
Кэриэстэбилэ да сүдү.
Оонньообут олбуорум,
Ойуоккалаабыт томторум,
Отоннообут тыаларым,
Оҕо сааһым үрдэллэрэ.
Ийэм ытамнньыйа атаарбыта
Ийэ сирбин көмүскэтэ,
Иһигэр күүскэ аймана
Илиитинэн сапсыйбыта.