– Ту со издраса? – удивлениёса спучья хуланы квартирантку.
– Дриван шылало тумэндэ дро клубо.
– А мангэ ничи. А кэдэ ром г’аздыя пэскири аспидно брода, аж жаркэс скэрдяпэ.
Кана Николаё Петровичё смог дурыдыр тэ лыджял сэндо. Ёв решил бутыр тэ на кэрэл дасавэ ошибки. Кэдэ уштыя, глосяса башадя серьёзнэс:
– Товарищи, исы мнениё, со прения стронатыр амэнгэ на чейно. Ёв приг’алыяпэ, прияндя бабакэ извинения. Ёв согласно добровольнэс возместить бабакэ убытки. Ту пирдал сельсовето отдэса, или пэса ловэ прияндян?
– Пэса.
Пустышкин уштыя штэтостыр, почюдя пачка ловэ про скаминд, снова бэштя. Николаё Петровичё г’аздыя лэс:
– Нат, Вася, кана уже на чейно тукэ тэ бэшэс прэ адалэстэ почётнонэстэ штэто.
Чутко зало отреагировал.
– А если лэскэ одой куч?
– Нехай ещё трошки побэшэла.
– Мэк присыклёл.
– Одой лэскэ удобно.
Пустошкин прибандияпэ, джял тэ родэл штэто дурыдыр якхэндыр.
Николаё Петровичё побавшадя кудуняса:
– Мангав тэ переачен. Кон адай чаворэнца – мангав тэ джян залостыр. Скицик молы тэ ракирав.
Со – то дро зало зашелестело, зашуршало, а пал адава скицик – то джювлэн пхэндлэ:
– Адай чаворэн нанэ, сарэ кхэрэ сутэ.
Николаё Петровичё потырдыя накхэса:
– Мэ фано шунав.
Зрители, хай, опять лынэпэс веселиться, нэ Николаё Петровичё екхатыр обрискирдя:
– Откэрэнти фэнштра! Шелоро Романова, мангав адарик про штэто.
Добровольцы чюрдынэпэс тэ откэрэн барэ фэнштры. Дро зало загэя свежесть лынаитко августоскиро бельвеле.
Хуланы спучья:
– Конэс ту дыкхэс? Саро времё егозишь про штэто.
– Мангэ интересно прэ тумарэ ромэндэ тэ подыкхав.
– Нэ, дыкх, дыкх. Мэ тукэ пхэндём, со и театро амэнгэ на чейно. Бэш спокойнэс. Кана явэла второ действиё.
Про колын председателёстэ опять колыхнулись медали.
– Тумэн, Шелоро Романова, скицик моло можно мангэ тэ кхарав?
Ёй спокойнэс пхэндя:
– А мэ и адацир куч дыкхав.
Николаё Петровичё строго пхэндя:
– Сэндоскэ са екх, со тумэ дыкхэн. Сэндоскэ чейно, собы мануша подыкхэна прэ тумэндэ.
– А ту ман, Николаё Петровичё, не стращай. Мэ на дарав.
Нэ ко сцена, кай сыс товарищеско сэндо, выгэя. Ёй на дарэлпэ. Иначе на уридя бы лачё урьяибэ. Хай нанэ сыр обвиняемо прэ сэндо, а сыр прэ саво – то концерто. Подбоченилась, встряхиндя калэ бала. Мэриклэ башавэнас зоралэс, сыр председателёскирэ медали. Нашты тэ пхэнэс, со ёй сыс гожа, нэ на проджяса мимо. Барэ якха, крупна ушта, нарумянена чямья.