Үһүс сылларыгар Инналаах Дмитрий, этэргэ дылы, харахтарын симэн, кулгаахтарын бүөлэнэн бииргэ буолбуттара. Кинилэри тула элбэх тыл-өс, сэмэ-суҥха тарҕаммытын сүрэхтэринэн да сэрэйдэллэр, биир бигэ быһаарыныыга кэлэн хаалбыттара. Уонна бу сиргэ төрөөн тапталы билбит, тапталга тиксибит дьахтардаах эр киһи «түөрт дьоллоох сылы түөрт хонук кэлэн ааһарын курдук чаҕылхайдык олорбуттара эбитэ үһү» диэбит курдук дьылҕаламмыттара. Дмитрий, бэйэтэ ааттыырынан, бу күн сиригэр көрсүбүт баарын-суоҕун, баайын-дуолун, тапталлаах Иннатын—»Тапталинатын» соҕотох хаалларан эмискэ сүрэҕинэн охтон олохтон барбыта, хаһан да бүтүө суох харах уутунан сууннарбыта… Күүтүллүбэтэх өттүттэн ааҥнаан кэлбит аһыыттан хаҕа эрэ хаалбыт Иннаны оҕолоро эрэ олох диэки тардыһыннарбыттара.
Иннаҕа сир үрдүгэр тапталы билбит дьолун туоһулара – Дмитрий элбэх суруктара уонна иккиэн түспүт хаартыскалара хаалбыттара. Дьикти ээ, кылгас дьол түгэннэрин эрэ бэлэхтиирин билбит, сэрэйбит курдук, ураты уйаннык, сылаастык да сыһыаннаспыта. Дмитрийдиин ыал буолан куоракка көһөн киирэн баран Инна, оскуолаҕа буолбакка, элбэх командировкалаах, учууталлары кытта методика өттүнэн үлэлиир аналлаах тэрилтэҕэ үлэлээбитэ. Онон сотору-сотору командировкаҕа баран хаалара. Дмитрий Инната хайа күн тахсан барыаҕыттан сурук суруйа-суруйа сыттык анныгар мунньан барара. Кинитэ суох оҕолору кытта хайдах олорбуттарын, тугу гыммыттарын, ахтылҕантан, күүтүүттэн олус эрэйдэнэрин сурукка тиспит буолара. Аны хоһоонноругар ис сүрэҕиттэн тахсар истиҥ иэйиилэрин суруйан хаалларбыта…
Инна сыттыгын анныттан суруктарын* мунньа сылдьар альбомун таһааран арыйталаан барда.
Тапталлаах доҕорбор, Инна Тимофеевнаҕа, аныыбын.
Тапталинам
Таптааммын ааттыыбын, доҕоруом,
Таптыыр доҕорбун – Тапталинабын,
Эн эрэ баар буолаҥҥын,
Күндү таптыыр киһим,
Сахабыт сирин халлаана
Харахпар көҕөрөн көстөөхтүүр.
Таптыыр киһилээх буоламмын,
Олоҕум сырдыкка тардыһар,
Эйигин сөбүлүү көрөммүн,
Сыыспатах эбиппин, доҕоруом.
Эйигин өрүү таптыыр Дмитрийиҥ.
Ахсынньы 14 күнэ.
Тапталинабар
Арылхай эйэҕэс хараххын
Ахтабын, доҕоруом, куруутун.
Эйигин көрдөрбүн, доҕоруом,
Умнабын барытын сир үрдүгэр.
Кэрэчээн куоласкын истээри,
Кыракый оҕолуу үөрэбин,
Эйигин көрсөммүн, доҕоруом,
Дьоллоохпун дэнэбин өрүүтүн.
Дмитрий.
Тохсунньу 1 күнэ.
* * *
Доҕорум, дорообо!
Сэгэриэм, барытын олус үчүгэйдик өйдүүбүн. Эйиэхэ олус махтанабын. Эн баар буолаҥҥын, эйигин көрсөммүн, олус дьоллоохпун дэнэбин. Сэгэр, эн биһикки, били этэргэ дылы, таҥара анабылынан көрсүбүт дьоммут, онон дьылҕа хаан анала хайдаҕын бэйэтэ быһаарыа.