Служба с акафистом преподобной Анимаисе - страница 2

Канон преподобной матери Анимаисе Ирмосы канона на недельные гласы. Запев: Преподобная мати Анимаисо, моли Бога о нас. Просвещением трисолнечнаго Божества озарившеся,/ангельское служение на земли совершила еси,/ три ипостаси Богоначальны воспевающа,/ молитвами святыми к Человеколюбцу возносящаяся,/ в годину лихолетия Бога не отреклася еси,/сиянием силы духовныя тьму безбожия растерзала еси,/ ныне же мя, темностию страстей омраченному,/ просвети ко спасению,/ светоносную память твою чтущаго. Совесть имущая к Богу неоскудную/ и око сердца чистотою блистающа,/ о, мати Анимаисо, Церкви Христовой украшение явилася,/ Невестою непорочною Жениху Богу предстояща,/ греховныя смерти спасай мя,/ яко молитвеннице благая. Слава: Зиждемый бысте Богу Духу Святу души твоея оживотворенный храме,/ душевное возложиста желание к благовестию,/ преподобная наша мати,/ страждущия словом утешения укрепляла еси,/ малодушия исцеляя,/ глада и хлада адскаго отгонительнице,/ укроти бурю сердца моего, грехом раздираема,/да в тишине Божией пребывающа,/ песнями возславлю подвиги твои и жизнь безконечную. И ныне: Из боку чисту Девыя /пройде Солнце правды,/ плотию Пречистою облекшеся,/ осияя вселенную Триипостаснаго Божества зарями,/ страсти лютыя ума моего утоли, Владычице,/ и исправи мя заблудшаго, яко да славлю Тя. Песнь 3. Высотою смирения украшаема,/ преподобная мати Анимаисо,/ с чины небесныя воспевающа трисвятыми гласы ныне,/ на земли небеса явила еси послушанием и верностию Богу в Пресвятыя Троице,/ молитвами, постом и воздержанием душу божественными даровании исполнила еси,/ о, святая Анимаисо, моли спастися души моей. Потоки слезными исполнивше сердце свое кроткое,/ богомудрая наша мати,/ и плоти своея умерщвление воздержанием явила еси,/ ныне упроси Бога, молит тя душа моя грешная,/ грехов многих и страстей зверообразных изцеление низпослати ми/ и души моея прощение. Слава: Дивный образе милосердия являеши/ и подвигами жития наставляеши,/ к добродетели и высоте возводяще Божественнаго делания,/ мати Анимаисо всечестная, / моли Бога спастися души моея. И ныне: Богородичен. Болящим изцеления источаеши,/ отгоняя болезни телесныя и душевныя,/ страсти человек врачуеши,/ предстательством преподобныя мати нашея Анимаисы, / даруй ми погибшему спасение,/ Дево Пречистая. Таже: Господи, помилуй.(трижды) Седален, гл.4 Житейское море бурное преплывше,/ образом благочестия мя наставляеши,/ яко ключи храма Пресвятыя Троицы от врагов сокрыша,/ ключи нерушимого духа миру явила еси,/ девственнаго подвига печатию истину веры торжествуя,/ пути к Богу в Троице открыла еси,/ ключи Божия Царствия сохраньшая. Слава, и ныне, Богородичен: Пречистою утробою Твоею Младенца Бога сокрывающа,/ велию тайну Триипостаснаго Величия соблюдши,/ Дево, пристанище тихое безстрастия,/ всея вселенныя тишиною явльшаяся,/потреби тлю сердца моего/ молитвами мати преподобныя. Песнь 4. Житие непорочне твое плод премудрости явистася,/ небеснаго жития предвратие образовашася,/земли дольней преминовение/ в ожидании небеснаго стяжания,/ преподобная мати явила еси во образе ангельстем,/ со безплотными лики взывающа:/ слава силе Твоея, Господи. К небесному пристанищу устремишася,/ мати наша Анимаисо,/ и земный храм Пресвятыя Троицы своим попечением не оставила еси,/ благолепне украшенный явила по времени,/ и нам, лучами чудес твоих просвещенными,/испроси у Господа даровати силу духовную/ и решимость подражати житию твоему,/ да согласно с лики ангельскими воззовем:/ слава силе Твоея, Господи. Слава: Небесныя надежды стяжати сподобившаяся,/ земныя печали отложше, аки сорныя,/ сподоби нас добродетелей твоих наследники и общники быти,/ да воспоем с тобою и со ангелы Богу:/ слава силе Твоея, Господи. И ныне, Богородичен: Блажит Тя, Пречистая, всяк возраст и всяка душа верных,/ Бог бо Слово паче ума от Тебе воплотися,/ сохрани и соблюди люди Твоя,/ Бога в Троице славящия,/ молитвами Твоими,/ Дево Пренепорочная. Песнь 5. Возсия в тебе Господь, Егоже от всея души возжелала еси видети/и Ему Единому служити,/ мати Анимаисо прехвальная,/ внутреннима очима зряще неизреченную доброту Господа Бога нашего,/ и любве ради Христовой в острецовской веси вселистася,/ непрестанною молитвою пищи неизреченныя сподобилася. Боже Отче Вседержителю,/ Боже Слове и Божественный Душе,/ утверди, Единоначальная Троице, Твоя певцы,/ славящих Тя вкупе с блаженною Анимаисою и всеми святыми возвесели,/ вся стрелы разжженныя лукаваго потреби. Слава: Благодати утешения сподобилася еси,/ преблаженная мати,/ сего ради свыше ожидаем твоего посещения,/ настави нас на пути спасения/ и Божественнаго Царствия сотвори нас причастники. И ныне, Богородичен: Воспойте Господеви вся земля,/ претворившему и преобразившему ны от злобы всякия к добродетели,/ соблюдающа вселенную десницею Своею,/ молитвами Девы Пречистыя,/ твердою мира душевнаго надеждою и похвалой. Песнь 6. Силою Христовою укрепляема,/ мати всехвальная Анимаисо,/ вся коварства лукаваго низвергла еси,/ святыми своими молитвами, богоблаженная,/ Бога Духа Святаго красоту и доброту в сердце носяща,/ и ныне предстоиши Богу Вседержителю,/ у Него же знамения и чудеса испросивше,/ угодница Христова пресветла явистася. Небеснаго богатства восприяла, премудрая,/ богомудренными помыслы украсившися,/ и яже на земли отвергша тленная,/ к горнему устремилася еси,/ ныне к раце мощей твоих притекающим/ подаваеши изцеления и милости неоскудныя,/ полки же прогоняеши бесовския,/ возвещая небесную радость жития своего. Слава: Слава, Господи, всем преподобным и всем святым, / Божественными повелении Твоими нравы добродетельны стяжасте,/ смирение, любовь, кротость и незлобие,/ сего ради лукаваго змия умертвиша священными молитвами, бого-блаженнии,/ от Христа Бога дарования прияли есте,/ изцелений дары смиренно просящим подаваете. И ныне, Богородичен: Греховныя моя страсти, Пречистая, исцели, молюся,/ Ты же безстрастия источник еси, Царице Небесная,/ и просвети мя Рождеством Своим,/ преподобных молитвы приемлюща.