Служба с каноном и акафистом преподобной Анимаисе Родниковской
и Острецовской – подвижнице благочестия ХХ века На Господи воззвах: стихиры умилительны,гл.6 Подобен: Всю отложивше: Анимаисо, мати всечестная,/ души моея крепосте,/ надеждо моя и упование,/ услыши стенание и молитву мою./ Настави мя на пути спасения, /любовию и участием наполни страждущее сердце,/ наставнице благая,/ Бога в Троице любимице всехвальная. Анимаисо, мати всечестная,/ милосердия сияние,/ тепло доброты и мира душевнаго,/ образе светила во трою единства совершенный в сердце своем сохраньшая,/ буди верным утешением опечаленныя совести моея,/ да открыются и мне, окаянному, пути спасения истиннаго./ Яко во времена власти безбожныя веру и целомудрие неврежденны сохранила еси/, тако и нам даруй ныне целомудрия возвращение,/ избавляя малодушия и бури сомнений,/ тьму нощи омрачения отгони,/ и покрова мрака греховнаго завесу раздраша,/ светом покаяния озари души наша. Анимаисо, мати всечестная, /монашествующих похвало, смиренных утешение, /в бедности отрадо, в трудех быстрая помощнице,/ в горестех безмездная молитвеннице,/ утиши печали в злостраданиях/ предстательством своим пред Господом Богом нашим. Слава, и ныне, глас 2. Пречистыя Девы служительнице,/ Анимаисо, мати преподобная,/ безплодную пустыню сердца моего научаяй возделывати / непрестанными теченьми слез и воздыханий о гресех моих,/ молю тя, умоли Владычицу мира/ сподобити мя деснаго предстояния /пред Престолом Божиим, /егда сядет судити миру, якоже есть писано. На стиховне стихиры, глас 6. Спасе мой, Иисусе Христе,/ Всемилостивый Боже мой,/ приемый блудницу и мытаря оправдавый,/ души моея стремления узри,/ Всеведущий Сердцеведче, /и покаяния моего образ приемля,/ спаси, о, Иисусе,/ от смраднаго обольстителя,/ от зверохищнаго антихриста /и духа вражия тлетворнаго, /разруши сети преисподния/ и спаси мя, Благодателю Святый. Лестию зловредною растлен еси,/ како явлюся Престолу Судии,/ Вечнаго и Нелицеприятнаго,/ но молю о милости прощения, Христе мой Иисусе,/ и зову Ти надеждою:/ молитвами всечестныя матери Анимаисы, помилуй мя, Спасе, грешнаго. Завистию вражией от Тебя отторгнутый,/ клеветами диавольскими Тя лишенный,/ Милостивый мой Спасителю,/ помилуй мое неразумие,/ прости мое маловерие и души моея пропасти бездонныя зряще,/ Сам спаси и сохрани мя, грешнаго. Слава, и ныне, глас тойже: Богородичен. Пред Тобою, Царице Небесная, / со слезами и горестию предстою,/ныне от врага умерщвление души моея зряще, Пречистая,/ и в несчастие нечестия, аки ризу смрадную, облачение мое,/ в гонениих упование не утративши,/ помилования Пресвятыя Троицы просящи,/ молю Твоего пред Богом предстательства, Владычице:/ врага лютаго избави мя,/ услышав жалобы и стенания души моея,/ защитою и быстрою Помощницею явися измождению моему,/ внемли и вопли непрестанныя услыши,/ и яко Нерушимая Стено веры моея и упования ставшая,/ спаси мя, Приснодево, грешнаго. Таже: Тропари, глас 6: Помилуй нас, Господи, помилуй нас: Слава: Господи, помилуй нас, на Тя бо уповахом: И ныне: Милосердия двери отверзи нам:
